Psalms 37

Khindusulu yi mutu wusonga

Nkunga Davidi.

1Kadi fuemina batu bamvanganga mambimbi.
Kadi monanga kikhenene bobo bamvanganga mambimbi.
2Bila banga biti, bela yuma mu nsualu ;
banga biti bi nlangu bela lebuka mu nsualu.
3Tula diana diaku mu Yave ayi vanga mamboti ;
buna wela vuanda mu tsi ayi wela zingila mu ndembama.
4Mona khini mu Yave
buna wela kuvana mambu mantomba ntimꞌaku.
5Yekula nzilꞌaku kuidi Yave,
Tula diana diaku mu niandi,
buna wela vanga diambu diadi :
6Wela kienzula busonga buaku banga kiezila ki khiesa buisi
nzengolo yi diambu diaku banga thangu va midi.
7Ba dio sui va ntuala Yave,
ayi wuntadidila mu mvibudulu
kadi fuemina batu bu balembo
moni mamboti mu nzilꞌandi ;
ayi kadi fuemina batu balembo sadila
makani mawu mambimbi.
8Bika buela fuema ayi zimbakana nganzi ;
kadi fuema bila dieti nata kaka ku mambu mambimbi.
9Bila bobo bamvanganga mambimbi bela lalukusu ;
vayi bobo bantulanga diana diawu mu Yave bela tambula tsi banga kiuka.
10Fioti kuandi fisiedi, buna batu bambimbi balendi buela monika ko ;
buna wela tala buangu kibabedi vayi bela va ba ko.
11Vayi minlembami miela tambula tsi banga kiuka
ayi miela monanga khini mu ndembama yiwombo.
12Batu bambimbi bamfielanga batu basonga
ayi beti kuba kuetila meno.
13Yave wunsevanga mutu wumbimbi ;
bila zebi ti lumbu kiandi kalembo yizi.
14Batu bambimbi bavola bisabala
ayi baleka mimbasa mu diambu di vonda
nkua kiadi ayi mutu wusukama ;
mu diambu di zenga bobo
bandiatanga mu nzila yi lulama.
15Bisabala biawu biela kota mu mintima miawu veka ;
ayi mimbasa miawu miela kelulu.
16Baka ku fioti ku mutu wusonga kulutidi
ayi baka kuphuedi ku wombo di batu bambimbi.
17Bila lulendo lu batu bambimbi luela kelulu,
vayi Yave wunsimbanga batu basonga.
18Bilumbu bi batu bakambulu tsembolo bizabikini kuidi Yave
ayi kiuka kiawu kizingilanga
mu zithangu zioso.
19Mu thangu yi ziphasi, balendi yuma ko
mu lumbu ki nzala, bawu bela mona khini yiwombo.
20Vayi batu bambimbi bela bungana.
Bambeni zi Yave, badi banga kitoko ki zitsola,
ziela lalakana ; ziela lalakana banga muisi.
21Mutu wumbimbi wundevanga vayi kavutulanga ko ;
Vayi mutu wusonga weti kabula mu luzolo lu ntima.
22Bobo Yave kasakumuna
bela tambula tsi banga kiuka,
vayi bobo kasinga bela lalukusu.
23Enati Yave mueni khini mu nzila yi mutu
buna wunkindisanga zithambi zi mutu beni.
24Ka diambu ko bumini thutu ; kalendi bua ko ;
bila Yave wukunsimbidilanga mu koko kuandi.
25Ndiba ditoko, buabu ndieka nunu ;
vayi ndisia mona ko mutu wusonga wuyekolo
voti ndisia mona ko bana bandi balomba dipha.
26Mu zithangu zioso, beti kabula ayi vananga mu luzolo
Bana bawu bela sakumunu.
27Tina mambimbi ; vanga mamboti
buna wela vuanda mu tsi mu zithangu zioso.
28Bila Yave wunzolanga mambu masonga
ayi kalendi zimbakana ko mikhuikizi miandi.
Bela kebungu mu zithangu zioso
vayi nkuna wu batu bambimbi wela lalukusu.
29Batu basonga bela tambula tsi banga kiuka
ayi bela mukalanga mu zithangu zioso.
30Munu wu mutu wusonga wuntotulanga mambu ma nduenga
ayi ludimi luandi luntubanga mambu ma lulama.
31Mina mi Nzambi andi midi mu ntimꞌandi ;
Malu mandi malendi sialumuka ko.
32Mutu wumbimbi wumfielanga mutu wusonga
ayi wuntombanga kumvondisa.
33Yave kalendi yekula ko basonga mu lulendo lu batu bambimbi
voti kuba bika babedoso bu balembo sambusu.
34Tadidila Yave,
ayi keba nzilꞌandi.
Buna wela kuyayisa mu diambu wutambula tsi banga kiuka ;
thangu batu bambimbi bela lalukusu,
ngeyo wela bumona.
35Ndimona mutu wumbimbi, ayi mutu kondolo kiadi,
wuyunduka bumboti banga nti wu nlangu
mu ntoto wowo kabutukila.
36Niandi wuvioka, nsualu ayi kasiedi ko.
Ndintombidi ngolo vayi kasia monika ko.
37Fiongunina mutu kambulu tsembolo
ayi tala tala mutu wu lulama buna wela mona ti tsukulu
yi mutu wowo yidi tsukulu yi ndembama.
38Vayi bankua masumu boso bela vondo va kimosi
tsukulu yi batu bambimbi yela ba lalukusu.
39Phulusu yi batu basonga kuidi Yave yeti ba.
Niandi zingolo ziawu mu thangu yi ziphasi.
40Yave wukubasadisanga ayi wukubakulanga ;
wukubakulanga mu batu bambimbi
ayi wukubavukisanga bila mu niandi
beti suamina.